您好，歡迎來到HopeTrip旅行網！
|
【推薦】曼谷文華東方泰式自助午餐》》
我次次去親，都係先食一打生蠔（如果有嘅話），再食六件煎鵝肝，然後再加兩塊牛扒。點解我咁揀？一來係我真係鍾意食，不過鍾意還鍾意，都要考慮圍皮嘅問題，就算好鍾意飲麵豉湯，你都唔會走去飲兩碗啩！二來自己喺屋企煎鵝肝，會彈到一地油，一路食諗起之後要抹地會好唔開心。咁食完呢三樣嘢之後，我係未飽嘅，就可以睇下有乜頭盤嘞，今次我覺得個龍蝦肉最鮮味。  你可能會問，咦，你唔食魚生嘅？係呀，我唔係隨便食魚生㗎，而且我見佢尐魚生貨式普通，不如留肚食其他嘢好過喇今次我食鵝肝有少少得著，事關我見果鍋煎鵝肝上面有尐好細粒黃色物體，其他人就撥開佢淨係夾件鵝肝，我好奇呀，於是夾粒試下係乜嘢嚟嘅，點知原來係芒果粒，咦，呢個配搭感覺上幾啱喎，而且人地大廚咁安排得，一定有道理嘅，於是我又去芒果糯米飯果邊夾佢半個芒果試試，果然，係天造地設嘅配對，芒果嘅清甜，完全可以抵消鵝肝嘅油膩，食完六件都唔覺滯，真係想再食多幾件！不過唔覺滯同唔滯係兩回事，都係節制下好尐！
 之後就係食甜品喇，一枱都係真係唔知食邊樣好，但係食乜都好，都要先去攞番兩件馬卡龍同叫甜品枱個阿姐幫我整件橙酒班戟Crepe Suzette，可惜呀，而家嘅Crepe Suzette已經係預制件，唔似以前咁係即場做，味道梗有分別，氣派都唔同喇!最後，嚟杯咖啡，望住越嚟越繁忙嘅蕉柏椰河，感受下當日名作家喺呢度摘取靈感嘅餘韻，，陽光已經曬到入屋喇，不過曬我唔到喎，因為我一入座已經知會曬親，立即要求換位，所以至可以悠然自得咁坐喺度望住條河發呆！
 |
市場價：HK$ 222
