拍拖九年、年年傳婚訊,方力申同鄧麗欣(Stephy)呢一對到底有幾鐘意長跑?
好囉好囉,終於等到小方口中“35歲就結婚”嘅限期,今年二月年滿 35歲嘅方力申果然有行動,年初在無線節目《蜜月到訪》當眾求完婚,嗱嗱聲揾師傅擇定好日,鐵定明年九月拉埋!不過問到當事人,又是例牌話“大家冇限期”,其實仲等咩呢?下年Stephy都33啦。
傳足三年緋聞,小方、 Stephy直至 06年合拍《獨家試愛》才認撻著,至今九年,生活一早形同小夫妻。
周日( 28日)小方出席活動,雖然話將會回流發展,但就仍然死口唔認求婚成功及明年婚期。
九件餅女嫁得嘅嫁咗、生得嘅亦都生埋,除咗不停換畫嘅 Angela區文詩,同早前傳出婚訊嘅傅穎,都不及 Stephy年年傳一次、年年都證實系虛報。其實愛巢揾定、一早住埋、已經夫妻檔一樣孖住揾食幾年,仲等?
夾八字香港行禮
03年開始緋聞滿天飛、 06年戀情浮上面,人人都認定方力申娶硬 Stephy,系爭個日子啫!五年前小方公布限期,話要 35歲結婚,大丈夫果然有口齒,原來二月滿 35歲,已經趁住為無線拍《蜜月到訪》的大好時機求咗婚!據悉小夫妻風水信到足,求婚成功後便托高人夾定八字揀定好日,亦都聽哂高人話,鐵定明年九月在本港行禮,不過生仔仲未系時候㖞。
周日( 28日),賺完人仔嘅小方回港出席慈善活動,又懶神秘唔肯認:“佢梗系結婚理想對象啦,唔系都唔會拍咁耐拖!但冇吖!未求婚未擇日!有打算(求婚)都唔話俾你哋知,做咗你哋就知啦!我自己都唔心急,點解大家咁心急呢?乜你哋做定好大份人情咩?”乜你想收大份人情咩?你唔認又叫人點送呢?
回流掘金
同進同退的小方和 Stephy當年在 Paco旗下撻著、五年前齊齊北上揾銀、今年則先後重投 Paco太陽娛樂旗下回流。
《蜜月》求婚
年初播映的《蜜月到訪》,其實早在一年前錄定,當時方力申已經向Stephy求婚成功並開始著手籌備婚禮。
唔只《華麗轉身》,小方話未來都會多留港、以本地工作為主,亦承認同 Stephy“見多啲會好啲!”。
一早住埋