麥浚龍（Juno）2004年推出的歌曲《耿耿於懷》，唱盡“毒男”心聲，今年初推出續集《念念不忘》，直到近日與謝安琪合唱終結篇的《羅生門》，這3首歌構成愛情故事三部曲，熱爆全城，好多網民在網上瘋狂洗版，更表示到眼濕濕。這三首歌都系由黃偉文（Wyman）填詞，Wyman今日接受電話訪問，講番點解會有呢個concept。
Wyman表示：“件事系因為11年前寫咗《耿耿於懷》，12年我嘅作品展撞番Juno，當時完全唔知道揀乜嘢歌畀佢唱，我哋合作嘅歌都幾多，《有人》、《沒有人》、《濛》呢幾首都覺得可以唱，但當時隔離左右嘅人，都話要揀《耿耿於懷》，因為好多人鐘意《耿耿於懷》，當時我系有啲驚奇，因為呢首歌喺11年前，打榜成績唔系太出眾，電台、媒體高層唔覺得呢首歌特別好，原來群眾心目中好受歡迎。”
當晚作品展Juno唱咗《耿耿於懷》，效果好好，歌迷反應都好熱烈，Wyman就話：“我有個狂想同Juno講，啱啱事隔十年，我哋好耐冇合作，不如揾埋伍樂城做番只《耿耿於懷》續集，講番十年後呢個男仔點樣，你知Juno循例冇乜反應，之後過咗兩年，佢（Juno）同我講不如做，14年做呢首歌（《念念不忘》），擺咗一陣，到15年先派，佢可能覺得等重要時機派台，所以喺15年呢只歌面世。”
Wyman續說：“之後Juno又畀電話我：不如呢首歌、呢個故仔、呢個男主角，我哋舖排成一張6只歌嘅EP，將歌曲裏面每個人物都活化、立體化，佢第一樣諗到呢首歌裏面嘅‘你’，o依家分開後重新拍拖嘅‘她’，揾兩個女歌手飾演真人版，所以有《念念不忘》，好多人鐘意，我哋開始苦惱，故仔應該點舖排，其實仲有莫文蔚同Juno合唱《瑕疵》，莫文蔚飾演女朋友，之後到謝安琪呢首（《羅生門》），我提議不如反轉嚟寫，女仔眼中世界其實同男主角唔一樣。”
《耿耿於懷》《念念不忘》《羅生門》三部曲
（資料圖片）
Juno新專輯 分正傳外傳
Wyman表示構思呢幾部曲系見步行步：“唔系好有組織同計劃，因為做一首歌冇諗到有第二首，第二首時未知第三首系點，呢只碟有6首歌，《耿耿於懷》（不在新碟內）、《念念不忘》、《羅生門》系正傳，其他幾首系外傳，包括莫文蔚合唱《瑕疵》、周國賢合唱《雷克雅未克》，Juno獨唱《睡前服》、《單魚座》，呢6首歌加埋其實系一部微電影，不過冇拍到出嚟，我覺得好嘥。”
講到周國賢合唱嘅《雷克雅未克》呢首歌，Wyman表示系另一個“羅生門”，佢話：“因為喺Juno眼中系呢個故仔其中一個人物，仲系壓軸出現㖭，但喺我眼中系另一個故仔人物，不過兩條線喺呢張唱片有交錯，正如《阿飛正傳》嘅梁朝偉。”
Wyman又謂《睡前服》系講安眠藥：“男仔喺呢十年同新女友生活，但每晚都掛住舊女友瞓唔著，《單魚座》講呢個男仔性格出自雙魚座嘅相反，所以念念不忘，Juno真系雙魚座。”
耿耿於懷MV片段
