三年冇出碟的劉浩龍（師兄），今年因女友容祖兒穿針引線，成功加盟黃柏高的太陽娛樂。原定十月出新碟的他，卻因上月於 Instagram發表「汙糟手」偉論，遭全城圍插。風頭火勢，劉被掟入雪櫃，出碟無限期押後。
雖然被雪，不過，劉浩龍有天後女友照住，就算個多月冇工開，他依然不愁經濟，更於年初靜雞雞搬入月租七萬的貝沙灣大單位，繼續風騷離地。
容祖兒曾經為了劉浩龍向 Paco求情，不過最後師兄的工作仍然被太陽娛樂暫停。
入行 18年的劉浩龍，演藝事業發展麻麻，最威水就係溝掂天後容祖兒。
今年師兄經女友協助加盟太陽娛樂，原定十月推出新碟，新歌〈走〉亦在 5月中開始派台。有個天後女友、事業又有起色，師兄以為從此改變命運。三個月前跳級搬入貝沙灣，以 7萬月租千四呎單位。
豈料早前師兄發表的「汙糟手」偉論，遭全城喪插，唔止遭女友容祖兒鬧爆， Paco亦搵佢照肺。「 Paco鬧爆師兄啦！之前踢記者 DV，依家又整單『汙糟手』， Paco為避鋒頭，惟有將佢掟落雪櫃，寧願轉谷慧敏哥（陳慧敏）好過啦！」知情者說。
因為劉浩龍被暫停工作，多出來的資源全投放到新人陳慧敏身上。
被 Paco放入雪櫃，師兄亦唔想再成為箭靶，寧願自我摺埋，就連每星期的明星足球隊踢波都唔去。
閉關了一個月多的他，上周六晚（ 18日）終於出動。他與祖兒前後腳去中環出席好友 Calvin的生日會，天後到埗時，做男友的師兄當然要走出門外迎接啦！在場內玩咗半小時後，他們發現有記者影相，兩人即登上祖兒的保母車極速離去。「依家師兄好失落，祖兒叫佢靜下先，等啲人唔記得『汙糟手』事件先出番嚟做嘢。佢有咁大個後盾，生活費又使乜愁吖！」知情者說。
其實多年前，師兄已睇中貝沙灣旺娛樂事業。眼見多位住過貝沙灣的藝人愈住愈旺，加上有無敵大海景，所以去年尾，他與天後女友商量後，師兄終於一圓心願，三個月前空降到貝沙灣千四呎單位。
雖然搬入豪宅，不過師兄不敢太張揚，原定上個月搞 housewarming，卻因「汙糟手」事件打沉一切，就算出入亦顯得非常小心，知道有記者守候，佢寧願在家踎，怕招人話柄。
「汙糟手」事件的影響比想像中大， Paco只好暫時停止劉浩龍的工作，避一避鋒頭。
