中德混血模特兒貝安琪（Ankie）於德國時間2月1日誕下兒子，外籍未婚夫Simon相伴，兒子取名為Sebastian。貝安琪昨日帶同兒子由德國返港，適逢母親劉香萍由北京回港，兩人於香港赤鱲角機場會合。

　　一身便服打扮尚未修身形的貝安琪，手推BB車兼行李車現身，對於初為人母心情，她笑言已習慣，好開心，更大讚兒子好易湊，今次回港跟未婚夫Simon見面，又指兒子中文名會取名為貝小龍，因為Simon鍾意小籠包，對方沒有中文名，現時她仍餵哺母乳。問到兒子可有難忘事？她說：「BB長大得好快，依家他 衫係3個月大，但我好傷心執曬初生的衫，好唔捨得他好快大。」

　　一定搞百日宴

　　Ankie表示兒子相當懂得跟人溝通，而且經常會笑，是一個喜愛笑的BB，每逢起身就會望住她笑，感覺好得意。對於工作方面，她笑言可以開始工作要勤力賺奶粉錢，並會選擇於香港居住，如果有歐洲工作也會兩邊走。問到何時舉行婚宴？她說：「未知，暫時主要跟家人及BB一齊先。（舉行百日宴？）呢個要搞。（婚宴可以延遲？）係呀！（將婚宴和百日宴一起舉行？）呢個好主意。」

　　劉香萍催再生

　　榮升做外婆的劉香萍，坦言很喜歡小孩，Ankie出世時好聰明伶俐又得意，自己好想生好多小孩，加上本身是長女，有弟妹感覺生長於大家庭較為開心。她說：「希望Ankie起碼再生多個BB，湊成一個好字就最好，如果兩個男仔都好。我鍾意小朋友，有必要一定幫手照顧。」