香港最好吃的蛋撻在哪裡

   蛋撻簡單，但見工夫，本源自英國，卻地道得緊要。有人喜歡英式牛油皮，又稱曲奇皮，有人喜歡做法繁複的酥皮，有人說多層才好吃，但高手都不理你，最出名的豪華餅店周師傅說摺幾層，他自己都沒有數過！
 

九龍城：豪華餅店　有心機最緊要
   $6一個蛋撻，算貴，但九龍城的小店「豪華」，卻是長年人氣店，飲食雜誌常選它為全港蛋撻之冠，它的蛋汁香滑，酥皮鬆軟，一日賣過千個，周潤發、蔡瀾、蘇施黃都是常客，店主周師傅：「當年打工受氣，咪自己開舖，一做就40多年。」周師傅話其實賣蛋撻賺得微，因為用料靚，奶粉$1,300一包、法國忌廉$50一公升……「除咗大酒店邊有人捨得咁用？九龍城有十幾間面包鋪，唔易做㗎！」蛋反而不用貴，「蛋要用大陸蛋，因為夠企身，來路蛋貴得嚟會瀉開，泰國蛋仲會水汪汪。」材料再好，也要技術及心機，蛋撻不易做，「我請人返來做蛋撻，有師傅未試過一日搓30幾盤撻皮，嫌辛苦；有人一搓皮我就說不對，他翌日就不上班，因為我呢個人太奄尖！」搓皮，有師傅蛇王會十斤料一開二就搓，他說要一開四才搓得均勻，「薄啲就靚啲，三寸幾厚嘅皮，你幾好技術都唔會搓得靚。」外間不少蛋撻強調酥皮達百多層，但周師傅不理世事：「我未數過有幾多層。」他示範，先將油皮包水皮，摺埋（有四層），搓開再對摺，再搓開再對摺再搓，計一計應該是64層，周師傅說多也不一定好，他的做法，一次不能少，也一次不能多，「少一摺，就會標油，粉還粉油還油咁；多一摺，酥皮就會『抽筋』！」所謂抽筋是指酥皮縮水，低過撻殼，蛋汁就瀉出來了。「無心機，整乜都唔會好食！」周師傅說出了重點！
 

豪華餅店電話：008552-23820383
出爐時間：6:30am-7pm
地址：香港九龍城衙前圍道136號