|
地點:旺角砵蘭街147號祥興樓地下A鋪
開放時間:星期日至四：3pm至12:30nn ; 星期五及六：2:30pm至1:30am
電話:2788-2300
懷舊的霓虹燈招牌、八十年代唱片封套、黑膠唱片機、配上白綠方格的紙皮石地板，播着張國榮、許冠軍等經典金曲，這是旺角新開的懷舊立食店：炸理滷味。
店主之一Calvin身為八十後，鍾情八十年代舊物，將立食店打造懷舊感覺。盞鬼用上食字諧音粗口的店名「炸理滷味」，配合主打炸物和滷味，令人一見難忘。
立食店主打炸物、炸串及滷味30多款小食。人氣的炸串拼盤「炸理五串」$ 38 齊和牛粒、多春魚、黑豚五花腩、南瓜、墨魚汁香腸。炸串用了日式炸法，每串蘸上自家調製的薄薄炸漿，即叫即炸，薄透香脆。平均約$7.6一串，非常抵食。
招牌的炸理芝心海龍波波 $38，每日限量15份。用了蝦膠加墨魚膠，魚肉每日新鮮打成，釀入車打和水牛芝士粒。大大粒炸到金黃香脆，一咬芝士立即湧出，鮮味彈牙，可配上黑松露蛋黃醬同吃，更加滋味。
炸物當然不少的炸雞髀 $25，大大隻美國雞髀，用薑、葱醃過夜，再沾上炸粉即炸2次，鎖着肉汁，外脆內juicy，惹味啖啖肉。
滷水亦不馬虎，由Calvin自家調製，別於傳統滷水太重的五香味，加了瑞士汁的甜味及油雞滷水的鹹香味。如滷味大全$25，有齊滷味鴨舌、大腸及雞腎。大腸入味軟腍，肥美帶八角香味。
另有溫泉玉子滷肉飯 $35，半肥瘦滷肉鹹中帶甜，配上流心蛋，送飯一流。
炸串新西蘭特大咖啡菇 $22，即炸原隻大啡菇，香脆鹹香，肉厚菇汁豐富。
小食以外，有不少本地手工啤酒，一邊歎炸串小食，一邊beer一beer!
此資訊來源於HK 港生活
|
